← Is beag lá a théann thart nach gcloisimid faoi thubaiste nó faoi thragóid uafásach a tharla i gcearn éigin den domhan de bharr na drochaimsire - tuilte anseo, tinte ansiúd agus triomach nó stoirmeacha san áit eile. 🔊
← Tá daoine ann a deir gur tharla a leithéid seo riamh anall agus nach bhfuil ann ach go gcloisimid níos mó faoi na laethanta seo de bharr na réabhlóide atá tagtha ar chúrsaí cumarsáide. 🔊
← Ní shéanann siad gur tháinig agus go dtagann athrú ar an aeráid ach na hathruithe a thógadh cúpla céad bliain nó cúpla míle bliain, tá siad ag tarlú anois in achar an-ghearr, achar fiche bliain nó níos lú. 🔊
← Is é bunús na faidhbe ná an méid dé-ocsaíde carbóin, meatáin agus gás ceaptha teasa eile a scaoilimid isteach san atmaisféar. 🔊
← Tá sé seo ag tarlú ó thús na réabhlóide tionsclaíochta nuair a thosaigh na monarchana móra ag dó breosla iontaise chun a gcuid táirgí a chruthú. 🔊
← Cé gur annamh a fheicfeá simléirí móra arda agus iad ag scaoileadh uatha deatach dubh nó smúit suas san aer sa taobh seo den domhan nílimid gan locht. 🔊
← Níl aon deireadh le líon na gcarranna atá ar na bóithre againn ná le líon ná n-eitleán a thagann agus a imíonn ó na haerphoirt. 🔊
← Tá cleachtadh maith againn ar an gcompord a bhaineann le modhanna saoráideacha taistil, le feoil atá réasúnta saor agus le déantúsaíocht phlaisteach de gach saghas agus tá an-leisce orainn iad a scaoileadh uainn. 🔊
← Ní fios go díreach cén tionchar a bheidh ag a leithéid seo ar an aimsir, ar an bhfarraige agus ar an dúlra. 🔊
← Tá ár nósanna maireachtála faoi mar a bheadh fleadh agus féasta againn agus muid sásta ár bhfuillgháis a sceitheadh isteach san atmaisféar, rud a chuireann gaoth lenár gcúl chun muid a bhrú níos giorra fós don titim. 🔊
← Níl a fhios ag éinne beo an bhfuilimid ródhéanach chun an aeráid a athrú ar ais agus suáilcí an tsaoil a bhronnadh ar an gcéad ghlúin eile. 🔊